2014年12月30日 星期二

三文魚三角飯團


小朋友最喜歡用手食野,食飯、意粉食得多,有日忽發奇想不如做飯團,可以用手食,帶去野餐或睇波都好方便。找來N年前在家品店買的三角飯團模具,便輕鬆做出日本卡通經常看到的三角飯團。

我用了韓國米,2 mug,煲好飯後加3湯匙壽司醋、1湯匙麻油和少許鹽,拌勻,加以蒸好和壓散的三文魚,拌勻,然後加入模至滿,壓實,包上無鹽紫菜 (Piago有已裁好的現成紫菜,我則用大塊無鹽紫菜自己裁剪),即成,老公和阿仔見到成品都非常興奮,阿仔一個人食了兩件,有一碗大人飯份量啊!


認識大自然童書推介 #2至5歲


有次上parent workshop,老師介紹了這些有關Botany和Planet的書,當我們帶小朋友行山時,可以和書中的知識相聯系,輕鬆學習。






2014年12月15日 星期一

蒙特梭利工作 #2歲玩咩好? #practical life #木製樂器


我們家中會用蒙特梭利教學法教小朋友,而兩歲的小朋友大多未ready使用蒙特梭利教具,所以一般都會以practical life為主。

上圖是其中一項玩水的工作,只需在Aeon $12店買這套一式三件的漏斗,預備兩個樽,裝些水,如果想有顏色可以加點食用色素,就可以俾小朋友玩。

由於大中小的漏斗開孔大小有別,小朋友便觀察到水流的速度有不同,大漏斗流得較快,小漏斗流得較慢,通常玩此遊戲可以玩30分鐘。記得要放一塊抹布在旁邊,如果不小心倒瀉水,小朋友便可自行抹乾枱面。



我本人相信小朋友天生都喜歡音樂,所以買的樂器都要有好聲音才會買,以培養耳朵辨別優質的聲音,木製樂器便是首選。

圖中的木片琴和鼓都是Plan Toy出品的,在Wise Kids和Aeon都可以找到Plan Toy的玩具,木片琴的聲音未算得清脆,但至少也有高低音之分,而鼓則大力推薦,敲打不同位置會有不同聲響,一歲半開始便可給小朋友玩。

沙鎚在Early Learning Centre買,我喜歡他有隻腳可以企起身,另外響板在Aeon $12店買, 一包兩個,好抵玩。

希望大家預備好樂器後,可以多D同小朋友打打拍子,唱兒歌,好好享受玩音樂的親子時光!

2014年12月14日 星期日

首爾自由行2014 - Day 4 #鷺梁津水產市場


如果喜歡食新鮮海產,在首爾可以去鷺梁津水產市場,搭地鐵到鷺梁津站,出閘後有清晰指示牌,徒步五分鐘便到,很方便。

呢度有好多檔海鮮檔,全部在二地下,佢地都有相熟的餐廳,而餐廳,都在二樓,所以我都幾懷疑買完海鮮到煮出來的又係咪自己買果D海鮮,唔好以為韓國人一定誠實,在我們買海鮮途中就覺得同喺香港街市買餸差唔多...生客係會被劏的!  好在我地幾個金精火眼,計數check得夠清楚,買海鮮樣樣都自己揀,因為個檔主夠膽死專登找錯錢、講左價又反口、力推死蝦,所以各位都係便足功課先好嚟呢度。

如果嚟呢度,建議在早上十一點後,雖然有個別餐廳24小時營業,不過好食嘅都唔洗開咁長時間啦,而午餐和晚餐時間又超多人,要避開人潮較好。

我地的策略是先找了餐廳,才去買海鮮,唔幫襯海鮮檔介紹的餐廳,因為我地太早到了,早上九點半已到,周圍都水靜鵝飛,好易俾人扼。我地幫襯的皇帝食堂,水準麻麻,不懂利用海鮮的食法,廚藝又差,大家要避之則吉啊。



無內涵的海膽

忘記了什麼魚刺身,只記得好刃

鮑魚刺身,爽口鮮甜

烤蝦,燒到焦黑,實在太差了,蝦又無咩肉

烤魚,I don't like it!!!

反而隻花蟹最好食,烚熟都好鮮甜

食完海鮮,我地回酒店取行李便往機場,點知flight delay 2小時!  國泰派了餐券作補償,我們便在機場食多餐韓國菜。餐廳服務非常有限,侍應都無心工作,幸好食物都叫還可以,不過如果要自費我一定唔會幫襯。

牛肉氣鍋定食

泡菜豆腐氣鍋定食



2014年12月13日 星期六

幼稚園(K1)面試篇 #香港保護兒童會維景灣幼兒學校

面試日期: 20141115

呢間係我揀的幼稚園當中離家最遠的一間,搭地鐵要十分鐘,都唔算太遠。呢間幼稚園只有全日制,朝86,長過我返工,不過有午睡時間,如果返得開心就成日有其他小朋友一齊玩,啱晒沒有兄弟姊妹的阿仔,學習群體生活;如果返得唔開心都幾慘。呢度重有延長服務時間一小時,不過我們沒有此需要,我收左工都可以接佢放學,非常順路。

不過,呢間幼稚園透明度好低,面試前沒有開放日、不可預約參觀,連面試安排都保密,只有通知面試的信上寫了是小組面試。不過我都刨好晒個網頁,簡單知道幼稚園的日程和校園環境。之前報呢間都係參考趙榮德先生的推介,佢篇稿仲貼左喺學校門口。

由於呢間有嬰兒部和PN班,所以K1位俾街外申請始終有限,所以都係抱試下心態。

同日面試兩間,好幸運呢間面試時間是11am,沒有撞宣道茵怡。早到要在校門前排隊等候,夠鐘就入去大堂坐低,然後老師就宣佈面試是分開小朋友和家長,小朋友跟老師入去聽故事,家長叫名入另一間房面見,仲要填一份問卷,份問卷問下家長如何教小朋友品德和社交,對學校的辦學理念和課程特色的理解(好在有兩塊banner stand在大堂,有得抄!),對家校合作的理解等。

家長面見問了以下問題:
  1. 如果你們上班期間小朋友唔舒服,你會如何處理?
  2. 如何處理小朋友偏食問題? (好老實,我個仔無偏食問題)
  3. 如何處理小朋友發脾氣? (對我來說易過借火的問題)
  4. 小朋友如果被搶玩具會如何反應? (對有些家長可能好難答,但對我來說就好容易,重點係點樣教佢如何溝通和分享)

出去等多一陣,就見老師陸續拖住小朋友出番來,我見個仔拿著一份禮物,有餅、Thomas拼圖(Now.com.hk的贊助)和益力多磁石。阿仔沒有哭,可能係一早去茵怡都係自己見老師,warm up左,如果唔係突然要佢入去,未warm up實出事。我見有幾個小朋友喊得好勁,有個仲要由原本課室轉去另一個課室,叫埋爸爸媽媽陪住interview

離開幼稚園後阿仔話頭先講大象古仔,喊要搵媽媽(我估係有小朋友喊要搵媽媽)。在討論區,有家長話小朋友提及黃巴士、太陽伯伯、唱歌跳舞,似乎小朋友入去都係玩多。


呢間幼稚園感覺老師好疲倦,但做野好有效率,可惜睇唔到老師和小朋友的互動,唔知道有無經驗和愛心。

結果: waiting

嚐型格美食 - #Marimekko x Log-on Cafe Afternoon Tea #Greyhound Cafe


我一直也非常喜歡Marimekko這北歐芬蘭品牌,佢地的pattern總會看得人心花怒放,特別係Uniko花花,不過呢D咁高端的品牌價錢只可讓我望門輕歎,一隻最細的杯都要$250一隻,而且我總認為茶具餐具要襯埋一set先至靚,咁即係無二千蚊都走唔甩...都係恨下算吧。

點知Marimekko和Log-on Cafe來個crossover afternoon tea,用上Marimekko的餐具盛載afternoon tea,侍者的圍裙也是Marimekko的(真係心心眼!!),可以偽富貴的一餐,對於我呢D銀彈短絀的小fans當然不可錯過。

食品size很的骰,都是一口size,味道可以,又未至於超班,我個仔食左我一半個tea set(減少我吸入糖份的機會),好在我都係著重拿起花花杯飲牛奶抹茶的感覺,實在要牢牢記住呢隻杯的質感啊! (發夢ing...)

供應詳情:
日期:即日起至 2014 年 12 月 14 日
供應時間:下午 2 時至 6 時

Marimekko下午茶套餐 A$78
一人分量,包括草莓杏仁果撻、抹茶蛋糕、法式焦糖燉蛋、香腸丹麥條和一杯飲品。

Marimekko下午茶套餐 B$128
二人分量套餐,同樣有草莓杏仁果撻、抹茶蛋糕、法式焦糖燉蛋、香腸丹麥條,另加煙三文魚多士和飲品(可選茶奶咖啡)。






去完Log-on cafe,匯合老公後帶左個仔去左附近個鲗魚涌公園放電,玩到接近五點就去左Greyhound Cafe食early dinner.

呢間cafe在Harbour City開左咁耐我都未去過,今次竟然在太古城食到,環境仲要比尖沙咀好,因為有大落地玻璃窗,自然光晒入cafe內,無比舒暢。

呢度D野食比較濃味,可能係走Chic Thai Style,食完會超口渴,好在店子添水添得密,在寒冬中不用叫都會添暖水,很窩心呢!

蜆肉意粉,濃濃的海水味,還附有一條有彈性的醃Anchovy! 蜆肉也新鮮,不會有死蜆包在內,美中不足是如在沙灘食意粉...食到成口沙!  Oh no...

Salad Bowl有吐司、吞拿魚和生白菌,個mustard salad dressing好香,帶有法式芥醬風味,我想一個人食一碗...醬呢!  下次在家試下調呢個醬先 (我表弟在fb話預訂一樽呢,笑!)

迷你三式漢堡包,最喜歡用wood board上,夠raw & intimate。有strawberry cheese burger、thai eggplant pickle burger (金不換醬)和bacon cheese burger,配搭極之新穎,牛肉都是手剁的,極富牛味,超讚! 我特別喜歡那金不換醬,完全帶出了泰式特有風味,又有得偷師了。另外薯條厚切,金黃鬆脆,又確實好味。






2014年12月10日 星期三

幼稚園(K1)面試篇 #青衣商會(將軍澳)幼稚園


上篇講完聖安德肋面試,呢篇就講下青衣商會面試。我們一入去幼稚園,大堂已經很多家長和小朋友等候,我們往接待處交了表格,便在大堂等叫名,其間可以玩玩具,玩滑梯。不過阿仔鍾情玩廚房玩具,因為有門有掣,由於太多小朋友一齊玩,而佢又勁心急,竟然夾親有位小朋友的手指好在阿仔都有講sorry,我就引導他離開廚房玩具,玩其他東西。佢記得上次參觀時有Thomas大火車可以坐,今次見到架車收埋左,好想玩,不斷問我們想玩火車,我地答左N咁多次火車今日休息,所以無得玩。阿仔好失望。

等左45分鐘,終於叫名,入到課室,有一位老師接見我們,另外一位接見另一家庭。呢間問的問題都幾似坊間面試班的問題,答中有分,答唔中老師心目中的答案我估唔會有分。

點知阿仔一坐低就伸手攞車玩,無問老師,老公坐係佢隔離又唔教佢,印象分一定無晒。老師先問阿仔叫咩名,阿仔答得好有自信。然後老師問有幾多架車,阿仔即刻數一、二、三,三架,老師再指其中一架車,問他是什麼車,阿仔答貨櫃車,答啱。然後叫佢將最大的車放入籃,放完問佢剩低果兩架邊架細D,答啱,放完車入籃。

老師取出一籃膠生果,問他呢三個生果的名,答啱,然後老師問蕉皮食唔食得,答啱。跟住取出積木,有五塊,老師砌了一間屋,叫他跟老師砌番出來,做到,仲自我修正到完美無暇(D真係蒙特梭利訓練的威力!),跟住俾一條鞋帶和木珠,老師話教你串,不過蓮蓉包一手就拿起自己串,老師問佢係咪識,佢話係,其實平時屋企串珠條繩前面有條木條,所以易好多,不過蓮蓉包好有耐性串,慢慢來都可以獨立完成,老師中間見到他有少少困難亦有從旁鼓勵。

跟住老師問阿仔今朝食咩早餐,佢唔出聲,我懷疑佢唔記得左,因為佢經常都答我唔到係Playgroup玩左咩野,於是爸爸問佢「你今朝去客家好棧食左咩野?」,老師話你好早起身wor,不過都係無答,爸爸問左兩次先答食飯,我就解話話佢習慣食早飯嘅。跟住老師問阿仔邊個餵你食飯,阿仔停了一下就答自己餵。

跟住輪到問家長,此時阿仔即刻失控,離開位想攞其他課室後面的玩具玩,老公即時阻止他,盡量按住他坐好。老師問我地點知佢地學校,鍾意間學校咩野,有無睇佢地個website,小朋友有無返N班,都問得好general,不過我知佢地好鍾意小朋友返過N班先至返佢地K1,雖然我答無返N班不過有返playgroup,都預左會扣分,其實阿仔唔返N班,係出面等左45分鐘入嚟仲答啱晒所有問題,我已經好滿意,加上之前已interview左一間,真係有D攰架。

最後老師拿出禮物送俾阿仔,係兩隻蛋形印仔,一男一女,唔cute,老師問阿仔係咩野,阿仔梗係唔知啦,我地唔佢玩卡通玩具架,老師又叫佢估下似咩,阿仔無出聲,老師再問佢似唔似蛋,佢好為難咁話似,老師問佢有無食過雞蛋,佢都有答有。跟住就完成呢次interview.

Interview我唔係好鍾意間學校,因為我prefer學校比較creative,才可以讓小朋友發揮creativity。但係問呢D問題真係好conventional & boring,我希望學前教育著重creative & fun多一點。不過,老師都幾有心機等佢完成串珠,應該都對小朋友有耐性。

結果: waiting

2014年12月3日 星期三

幼稚園(K1)面試篇 #基督教宣道會茵怡幼稚園

面試日期: 2014年11月15日

基督教宣道會茵怡幼稚園俾我感覺是一間很傳統的幼稚園,最吸引的是擁有區內少數有戶外遊樂設施,亦是咁多間我揀的幼稚園中最近屋企的一間,步程只需五分鐘。今年呢間幼稚園由K1開始也引入Phonics教學,可省下出面學的金錢。

由參觀、報名和面試,安排亦很有條理,最難得是在交表格當天,家長可以選擇面試時間(如果該時段未滿額的話),家長問卷連報名表一併遞交,所以面試當天只需帶孩子面見即可。

我選了9am面試,由於呢間要小朋友獨自入課室面試,為免阿仔癡住我唔肯入,我叫老公帶佢去面試。結果阿仔是第一個面試,肯拖住老師手行入課室,五分鐘後老師和阿仔都笑咪咪咁出來,我幾肯定呢間一定收阿仔。

阿仔話有問生果和顏色,佢話識答。學校送左份禮物包,入面有一盒迷你維他奶、Oreo餅和一小包紫菜,全部都是阿仔喜愛的小食呢!

結果: AM offer

2014年12月2日 星期二

幼稚園(K1)面試篇 #天主教聖安德肋幼稚園

2014年11月8日,呢一日要去兩間幼稚園interview,本來唔係問題,問題係兩間相隔半小時天主教聖安德肋in 9:30am,青衣商會in 10am!  好在天主教聖安德肋成個過程只花20分鐘,一完左我就極速抱住個仔跑去搵老公(老公在門口開定BB),我一見到架BB車就盡花扣好安全帶,我地衝去青衣商會,沿途相信嚇親唔少去緊幼稚園interview的家長和小朋友,因為我同老公都跑得超快,用左3分鐘跑到去青衣商會,有驚無險。

天主教聖安德肋幼稚園面試都好特別下,在門口有老師幫所有入內的家長和小朋友擠搓手液,並確定有面試證才可上樓,上到樓才收面試證,然後在禮堂坐下,看幼稚園簡介video,看了10分鐘後,才叫名排隊,男女分開兩組,10個小朋友連家長一組(每位小朋友只限一位家長入內),一齊入課室,入課室前派發印有小朋友名字的label,家長和小朋友各一張,此時才發現印漏了我們的label!  老師們沒有怪責誰,最後手寫名字在空白label上讓我們貼上。

入到課室,有前後兩排凳,小朋友坐第一排,家長坐第二排,老師有三位,一位mark分數,一位協助,一位發問。蓮蓉包聽到老師話坐第一排便極速坐下,心急到呢,我便叫他行入D坐,坐係前面小朋友隔離。然後老師確保坐亂次序的小朋友坐番啱,由於我個仔和前後兩個小朋友坐亂了要起身調位,作為媽媽好自然都想調番坐係自己小朋友後面啦,點知我隔離果位媽媽郁都唔郁,我唯有禮貌地問她可唔可以同佢調位,佢都仲係無動於衷真係好奇怪好在另一位受影響的家長都想調位,肯同我調,果位無反應的媽媽才意識到調位有佢著數,於是三位媽媽都調到自己孩子的後面位置。

正式開始,主考老師出場,好似上堂咁同小朋友打招呼,然後取出一個女孩子布公仔同大家打招呼,話公仔叫欣欣,想認識大家,叫小朋友逐個話俾欣欣知自己叫咩名。我個仔好緊張,全程捉實我隻手指公唔放,我都由他,好讓他可以多點信心表現自己。好似好多小朋友係細B,唔敢出聲,有個一入課室時已經哭,他的爸爸俾左粒餅佢食定驚,點知含住粒餅唔講野。另外有個唔識講自己全名,只叫乳名,老師都俾機會佢講多一次全名,不過無出聲。蓮蓉包都要等兩秒,我在背後問多一次你叫咩名呀才答,不過肯答已經好好的了,未warm up,課室又多人,都幾驚架。

跟住老師攞出一本大書,打開有一隻狗,叫小朋友逐個同小狗講hello。點知問左三分一小朋友,便轉頁,有隻山羊,然後其他小朋友陸續同山羊say hello,蓮蓉包呢次答得快左,把聲仲幾cute。又問左三分一小朋友便轉頁,有隻乳牛,蓮蓉包即刻叫「呢隻係乳牛」! 證明佢已warm up完,重拾多多野講本色,老師陸續去其餘小朋友等佢地say hello

然後老師話同大家都識唱嘅「Head and Shoulders, Knees & Toes」,講真,你又知大家都識唱?!  好在屋企成日都有播呢首歌,不過蓮蓉包好緊張唔郁,唯有我嚟啦,又唱又跳,希望佢可以跟我做,點知佢唔郁,我就捉住佢手做動作,佢硬到郁唔到佢,連拍手都做唔到,算吧,眼見只有一兩個小朋友有跳,似乎呢班小朋友都係文靜D
最後派禮物,可以揀長頸鹿或恐龍推棒棒車玩具,蓮蓉包就好有反應話我要長頸鹿,家長亦有一份學校資料收,就完成今次interview


呢個形式都幾速戰速決,無反應就已經無望,對細B真係好難,就算蓮蓉包係大B都有D難,好在問題唔算多。

結果: pm waiting (即係唔收啦)

2014年12月1日 星期一

三十三個月大及 #K1面試心得分享

面試戰衣: Shirt - Gap, Jacket - Global Work, Trousers - Rag Mart, Shoes - Nike

呢個十一月係面試月,連續三個星期六都要面試K1,由於只有5Interview,所以唔辛苦,不過少少緊張都是有的(包括我和阿仔,我老公就當返工的心情)。面試的詳程請留意我之後出的blog,希望幫到將來面試的家長吧。總的來說,大B真係著數D,講野又多,見識多D,無咁怕陌生人,尤其要小朋友自己面試的情況,小朋友因驚而哭就一定衰硬。我見我個仔拍埋DB度,又生得高大過人,又不停講野,真係和細B相差好遠,等面試時,有細B家長見到我個仔咁不一樣,都慨嘆大BB一齊面試真係唔公平。其實生理上細B未發展到呢個位係絕對正常,只係而家好學校僧多粥少,加上龍年效應和雙非,競爭之激烈真係唔係當事人係唔會明白,其他旁觀者真係唔好成日話D家長報咁多間做咩,如果我係細B的家長,也會報多過而家呢,只係唔會報多過12間,同埋每天只會interview上午時段,因為細B精力一般好快無電,如果你想佢讀上午班就梗係爭取上午interview,俾老師見佢地早上精靈可愛樣博老師好感,覺得佢返上午班較適合,所以交表一家要最早除非你想佢讀下午班就另作別論。

面試時除左一定要帶面試證和出世紙外,還要帶餅乾、繪本和濕紙巾,有時等面試真係有機會等45分鐘至1小時(所以我幾辛苦都要早起身交表,尤其心儀果一兩間一定爭取9am面見,小朋友最精神,又唔洗等咁耐,等得耐小朋友一定唔耐煩,心情差又點會in得好?),等到肚餓唔出奇。帶繪本可以消磨時間,亦提升親子關係,老師見到都贏左印象分先啦,我唔建議帶玩具,一來等候區一般已有玩具,小朋友一定鍾意玩學校的玩具,貪其新鮮,如果帶自己玩具,小朋友基於安全感,一定會帶埋入面見室,阻止佢搞喊左就好難在interview有好表現。濕紙巾是萬一小朋友打噴嚏、流鼻涕、流鼻血(天氣乾燥唔出奇)、食餅整污糟件衫,都可以抹番,我個仔就係in in下打左兩個大噴嚏,噴左D口水落張枱,我抹完佢個鼻,再俾另一張濕紙巾佢自己抹枱,抹番自己的口水,咁老師咪見到佢有幫手做家務的能力囉。

K1面試,報了7間,全部是村校,因為不想老遠去九龍塘讀書,小朋友會好辛苦。有一間幼稚園太多人申請沒有interview機會,有兩間撞了時間放棄了其中一間,所以只interview 5間,蓮蓉包是大仔,雖然是龍B,但都不太擔心,所以沒有報太多間,不想小朋友大人一齊辛苦。
5間之中,兩間group interview1間兩位家長和小朋友一齊面見,1間只見小朋友,1間小朋友和家長分開面見還要填2份問卷。

阿仔表現像平日的他,對陌生的老師往往要打量一下,沉默應對,所以interview第一間時,老師發問未必會即時答,要等一下才答,但又好主動禮貌問其他小朋友取玩具玩,其他細B的媽媽或許會被他嚇壞呢老師也很出奇他的表現,問我是否有上N班,我說沒有,只上playgroup,老師更加覺得不可思議呢

最感動的是當有兩間要阿仔自己入課室面試時,完全沒有扭計,非常有自信拖著老師手入課室,interview完還笑著出來,始乎他的成熟度真的ready返幼稚園了,所以無論有無幼稚園收他,我已經覺得很滿意了。面試結果要十一月底至一月中才收到通知,已知收到一間am offer,亦係心目中排第二位的幼稚園。

See inside how things work

最近老公和阿仔看齒輪英文繪本,其實程序起碼是小三以上,不過男孩子天生對機械係特別有興趣,所以我買左呢本書《See Inside How Things Work》,是Usborne出版的。老公做動作解釋齒輪如何轉轉轉,將咁難明的理論簡化到幼兒程度,令阿仔好有興趣追看,看完還主動要求爸爸讓他畫畫,他嘗試畫出一個長形圓圈代表升降機,似乎科技知識已在內化了。

有一晚老公要去做球證,我話帶埋阿仔去,由於球賽在晚飯時間,所以我做了三角三文魚飯團,煮了紅蘿蔔仔和西蘭花做配菜,作為便當晚餐,老公第一次見我做飯團,嚇左一跳,讚嘆老婆非常專業,我真係好開心。阿仔好鍾意食飯團,尤其係塊紫菜,似乎我可以多在家做飯團俾佢作正餐,快快脆脆俾佢食完去玩,又唔會擔心佢食唔飽。

阿仔在球場成日追間爸爸去左邊,我就要指俾佢睇,其實無咩睇波,睇老公在球場跑步多D! 嘻嘻!睇完波搭的士回家,點知阿仔在的士賴尿,由於我抱住佢坐,所以我條褲中晒招,超慘!
Bambino Montessori Home果度已問左可以返到讀K1前,即是可以讀到三歲半,咁就唔洗中途轉playgroup!

成長進度:

自理能力:  學識著襪。多得我阿媽有次探阿仔時多口講句,俾佢試下自己著襪,平時蓮蓉包真係著唔到架,果日又真係威俾外婆睇


Maths: 一至二十的中英文已識背不過數數數完四就唔知點解去左六


Music: 識唱太陽伯伯和12345 Once I caught my fish alive,我愛媽媽(普通話版)識唱幾句,學緊唱Jingle Bell



用Home made playdough 扮賣雪糕

在海下灣玩貝殼

父子鞋

家中的美術堂 - Finger Paint畫樹葉


2014年11月24日 星期一

幼稚園(K1)面試篇 #保良局方王換娣幼稚園

蓮蓉包人生的第一次面試開始了,星期六早上九時面見保良局方王換娣幼稚園。由於此幼稚園只可以一位家長陪同,所以便由我帶阿仔去面試。這安排實在太好,因為同時間老公要到天主教聖安德肋幼稚園交報名表,最恐怖是老公六點九去到時已有廿幾人正在排隊,不比九龍塘名校遜色呢。

班房安排一次過接見四個家庭,坐下自選玩具玩,每個課室有兩位老師,每位老師負責問兩組家庭問題。

枱面有很多玩具,其中有一籃真生果,有香蕉、蘋果、橙,老師先問今日邊個帶你嚟呀,佢停一停先答媽媽,老師然後拿起逐個問生果的名稱,阿仔答得好輕鬆,老師又問他香蕉食唔食得,佢答唔食得,因為未熟,又真係wor,隻蕉仲幾綠下,連老師也說「你又知未熟嘅?」老師再問點樣先至熟呀,佢掛住玩無答,現在回想,其實當時如果自己即時引導個仔,例如問他熟香蕉是什麼顏色?  他可能識答,如果他再唔答就話一陣一齊去超市買香蕉試味好唔好,以佢咁為食的性格應該會有反應。後來離開學校後我再問他香蕉點樣先至熟,佢都係唔知,於是我教番佢,其實佢答未熟已經唔係一般小朋友識得答的答案,亦唔會在坊間的面試班背的答案,所以我都幾滿意佢呢D出人意表的答法。

老師叫佢揀玩具玩,佢望住我有D猶疑,我鼓勵佢去揀,你做得到嘅,於是佢去左斜對面小朋友張枱,有一盤工程車,問人地「請問可唔可以玩呢個?」老師都笑左,話佢識講請問,我當時好滿意,阿仔發揮平時唔怕生保又好發問的性格,老師即問我佢係咪讀緊N班,我答無,只返Playgroup,老師都非常意外,老師見佢掛住玩車,於是問我問題,例牌問點解揀我地學校,有無兄弟姊妹,平時邊個湊(老師一睇我個樣就估我應該要返工),放左工會同仔仔做D咩野。

後來老師叫佢,話你終於應我喇(老師非常溫柔的聲線,佢又咁專心玩緊,聽唔到真係唔出奇,都隔成兩張枱斜角咁遠架),我用手勢示意佢返埋我果度,老師問佢可唔可以切蘋果俾佢食,當時個仔玩緊切提子,唔啋佢,問左兩次都無反應,望都唔望個老師,我便幫老師問多次,佢又即刻肯做喎,仲肯扮餵老師食,跟住老師拿起一個人形布公仔,問佢可唔可以餵公仔食,個仔又發揮玩野的個性...餵落個鼻度!  老師問佢應該餵邊度食呀,佢都係餵落個鼻度,老師叫佢餵落咀度,佢先至餵落個咀度,老師想確認佢的認知,於是問佢媽媽個咀响邊度,點知佢指住自己個咀!  老師回應呢個係你個咀,咁媽媽個咀响邊度,佢即指住我個咀,然後老師叫佢錫錫媽媽,好在個仔好合作鍚左一啖,如果唔係會有理由相信我地的親子關係都幾有問題, 一額汗。老師再問公仔的眼睛响邊度,今次就即答,答啱。

另外三個小朋友都是男仔,月齡都比蓮蓉包細,坐得好定,不過講野好斯文,比較靜,我沒有留意他們的表現,只留意自己個仔的表現而已。

臨走前老師送每人一隻鴨仔,蓮蓉包竟然話...唔要!  我都覺得出奇,老師反應好快,即刻話「咁俾媽媽好嗎?」他便立刻給我,果然係trouble 2,不過最搞鬼係要走時,蓮蓉包玩到唔捨得走,我話不如出去搵爸爸、去公園玩都無動於衷,唯有話「咁媽媽走先喇」兼且起身,佢即刻起身,仲識幫我拍好張凳,再拍自己張凳,我即刻唔該佢和讚佢,唔係為搶分,而係真係多謝佢咁helpful和主動。可惜同老師講bye bye都係唔肯望老師,要我出手固定佢視線去老師度,費事再搞咁耐,搞到發脾氣仲大鑊。

我覺得個仔和自己的表現可以再好D,個仔唔係好理老師的指令,我又太緊張無咩執生,都好,下次in下一間會有多D經驗處理。

結果: AM offer!!! (大B真係著數D)

2014年11月22日 星期六

木婚紀念午餐 - #Gaddi's


Gaddi's是城中有名有歷史的高級法國餐廳,在半島商場內,雖然不是米芝蓮餐廳,但氣氛和質素依然會令淑女們心醉的。加上用匯豐信用卡簽賬可享9折優惠,老公覺得好抵食!

餐廳已換上聖誕裝飾,非常富有氣氛,有live piano 伴奏,女士們必份外受落。

這裡沒有米芝蓮餐廳的驚喜,卻顯得對傳統和食材原味的尊重,例如法式crepe,在客人面前由法國侍者即煎,用上最名貴的銅煎pan,燒香砂糖使crepe焦糖化,加上加熱橙酒帶來的酒香令簡單的crepe顯得不一樣。

生了孩子後要保持兩夫婦的感情,我們總愛透過食,食得精緻,在輕鬆而寧靜的環境慢慢談心,暢快愉悅。

salted & unsalted butter,最原始的味道,沒有添加配料

迷你牛角酥釀了洋蔥; 迷迭香麵包酥脆,兩件都非常好吃

老公喜歡迷你百吉包

聖誕裝飾處處

餐前小吃,三款也很美味

火腿釀雞肉

橄欖酥餅

芝士蝴蝶酥

吞拿魚,紅西椒

牛面頰,牛清湯啫哩,非常好味!

Parsnip soup,black truffle chicken dumpling,餃子好好食,湯頭夠熱富濃濃忌廉味


米形意粉,香草汁,想像不到意粉可以有這滑溜感,比risotto好吃好多

鱈魚,南瓜汁,魚質有點過熟

伴牛油蔬菜,有少見的青椰菜花,整體上非常鮮嫩

Earl Grey with Honey,我的最愛餐飲

Passion Fruit floating island,chocolate mousse, passion fruit sorbet, madeleine cakes - 不會過甜的甜品,經典的味道

Petite Four - lemon chocolate, berry jam chocolate, lavender truffle chocolate, white chocolate shell - I like the truffle chocolate most!

Crepe, 濃濃的酒香,經典的詮釋