2014年3月31日 星期一

帶著兩歲小朋友出外旅行



兒童飛機餐


沖涼設備齊全

BB床、寢具齊備,可惜寢具是粉紅色

好靚的high chair@Hotel Cozzi

兒童早餐
 今年年初,我忽發其想,想帶蓮蓉包去台灣旅行,老公非常配合,BookCX Holidaypackage,安排了三月天的三天兩夜旅程。

相信有很多媽媽都會帶小朋友出外旅行,我在網上都看過不少媽媽的blog,對帶孩子出國有多些認識,畢竟第一次帶兩歲的小朋友搭飛機。看得多,見到有些媽媽超級緊張,去三日帶12tee,當然,去唔同地方的準備都唔同,不過我同自己講,帶夠東西便可,不要帶多餘的物品,盡量令行李輕便,因為方便隨時照顧阿仔,我地連行李都沒有寄倉,省下等待行李的時間,阿仔亦無須等待(你都知咁細個小朋友,係最唔等得嘅!)

旅行前的準備

酒店
Book酒店時預先通知酒店會有兩歲小朋友隨行,酒店會安排BB(連枕頭和被),BB沖涼盆,腳踏(非常重要,方便沖涼和阿仔可以企住去wee wee),仲有沖涼溫度計(鴨仔形,阿仔當佢係沖涼玩具,!)。今次我地入住的Cozzi忠孝館,要超級推介,實在交通方便又bb friendly,對面馬路就已經係捷運善導寺站,除左房間有齊上述BB設施,早餐都包兒童早餐,大人就食Buffet, 兒童早餐和Buffet都日日唔同款,唔會食到悶, 我們食左兩日,兒童早餐第一日有饅頭、炒蛋、蕃薯蓉、西蘭花、炸薯餅。第二日有乳酪、炒蛋、腸仔、炸雞塊、饅頭,當然我like第一日的早餐多D,炸物唔會比個仔食,落晒爸爸個肚。

飛機餐
由於阿仔已兩歲,需要買機票,約成人7折價錢,由於航空公司(Cathay Pacific)已知道是小朋友坐,所以會default安排兒童餐,今次的兒童餐去程是茄汁意青瓜長通粉,回程是腸仔炒蛋粟米粒西蘭花,味道都唔錯架,不過航空公司只派匙沒有派叉,好在我地有帶,先至食到長通粉(空姐們都忙到無人理我地request要叉了)

上機
BB車是可以推到閘口的,不過要入海關前到航空公司櫃位安排「寄倉」,其實是入紀錄和派一個大膠袋給我們,到閘口時交給地勤用那個膠袋包裝BB,然後推BB車安放在機上。落機時,BB車便已停泊在下機管道出口。

帶著BB上機享有優先上機的特權,一上到機倉,第一時間搵空姐斟水比阿仔,小飲管杯是非常重要,飛機飛上天的氣壓會令耳仔痛,小朋友比大人更痛,小朋友要keep食野和飲水才可舒緩,阿仔就係返香港時突然爆喊,果刻佢就係食完塊餅又未接住食第二塊,所以耳仔痛,我就即刻俾水佢飲, 一飲水就無事了。

食具和零食
台灣是非常bb friendly的地方,去任何餐廳都會有兒童食具,所以我們帶的食具只在飛機上用,基本上帶匙、叉、飲管水杯、濕紙巾和bibb便可,碗和杯可以不帶。上飛機不能帶食物剪刀,唯有麻煩D用匙折斷意粉吧。

至於奶,由於我仍然餵哺母乳(不要驚訝,我只是有個非常愛吃的兒子,唯有母乳可以即食,令我堅持),所以沒有帶奶粉的煩惱。

零食是上機必備的,平時我只是比好少餅乾阿仔食,但上機就比佢任食,所以我帶了兩個小膠盒,一盒一程機,費是放在同一盒佢食到一半唔俾佢食就扭計,今次我帶了他最愛的動物餅,是在Marks & Spencer買的,成份較天然,made in Germany又較放心,而且好好味,連我都鍾意食。原本到左台灣想買鴨稻米餅,不過無時間搵,放棄了。

衣物
今次去台灣天氣只是微涼,16-20,所以帶阿仔的衣物算少。
羽絨褸 x 1
毛衣 x 2
長袖Tee x 2
內衣 x 3
出街長褲 x 3
x 4
睡衣 (上身) x 2
睡褲 (下身) x 4
布片x 6 (由於我們有洗片和阿仔已戒日片,最後只用了3,好慳位!)

玩具
搭飛機必備玩具,講真要小朋友坐咁耐,佢地會好辛苦,所以帶備娛樂措施實屬必須。今次我機程短,我帶左蠟筆、簿仔、一本書、一張貼紙,再加上食野,足夠他坐定定到落機。如果小朋友較驚青,俾佢平時玩開的公仔攬住會有安全感,不過要防止公仔跌左,如果唔係後果不愖設想。
阿仔上機前一晚興奮到瞓得好差,兩個鐘醒一次,所以搭一點機,一上機就瞓到落機,回程就因為上機前瞓飽左,所以全程八八卦卦,所以今次少量娛樂都已足夠。

藥物
帶備少量藥物以防萬一是必須的,如果長途又去得耐可以考慮去醫生到配定平安藥,今次我地只去三日兩夜,所以只帶平時食開的藥,包括退燒水、咳水、藥水針筒、退熱貼和耳仔探熱針。好在今次無用。

行程安排
盡量維持小朋友平日的作息安排,以減少扭眼瞓機會。


我們今次去了好少地方,因為唔想大家都咁辛苦,去左搭貓空纜車、動物園、誠品書店(松箊和信義店)Sogo、微風廣場,阿仔好開心,可以去咁多街,返酒店好快就瞓左,又比平時遲起身,我和老公都可以比平時瞓多D

帶小朋友去旅行比想像中輕鬆,而且多一份與別不同的開心感覺,希望到夏天的長途旅行都順順利利啦!

2014年3月5日 星期三

兩歲了!



上個月的成長進度:

蓮蓉包有90cm,買衫要買size 100,真係快高長大。佢依然好為食,而家學緊食雞翼,仲想咬舊軟骨出來,真係識食。

playgroup已經自動波執玩具,返到屋企奶奶會提佢執,無堅持佢執,唔執就算,我就睇唔過眼,試過唔肯執,我收埋所有玩具唔俾佢玩,佢大喊女麻女麻,我叫奶奶行開一陣,由佢喊,佢冷靜D再同佢講數,唔執玩具就唔俾玩,之後就合作番。佢係試我地底線,家規一定要執行,唔縱得,好在奶奶無意見。

蓮蓉包而家玩knob puzzle快左好多,所謂俾兩歲玩的knob puzzle已無難度,所以我都無再買。拼圖未開始俾佢玩,因為想佢有logical thinking先開始玩。

呢個月多左Imaginative play,例如扮食野,扮揸車, 勁鍾意IKEA的玩具工具箱,成日用螺絲批,模仿修理鞋櫃、抽濕機和玩具車。

男仔對於空間感係比女仔叻,佢已經唔再只係把積木疊高,識得橫向發展,用積木砌火車,多得老爺日日收工陪佢砌積木,有得俾佢模仿。當我第一次見佢自己砌火車時,真係好驚訝,小朋友學野真係好快。

終於對畫畫有興趣,之前只係在畫紙畫左一筆就走左去,而家畫多左好多筆,又會叫我俾筆佢畫,D天氣暖D我就同佢玩finger paint & water draw (即係只點水畫,唔加顏料)

平時家長會禁止小朋友接觸針線,雖然我都未俾針線個仔用,但就教佢觀察衣車。事緣有晚上左奶奶屋企食飯,佢攞左架衣車出來教個鄰居用,個仔未見過衣車就發晒狂要摸,奶奶只係叫個仔唔好過嚟,我就成機把抱住佢講「等媽媽教你衣車點用啦!,近距離望住架衣車, 蓮蓉包就好定咁聽和觀察,小朋友呢個階段最想學習身邊事物,唔好以為咁細個唔識就唔教,其實入左潛意識,到將來真係要學果樣野,就會易學好多。
 
最近買左泥膠試下俾佢玩,點知佢好驚果種觸感,下次試下自己做play dough,睇下好唔好D
 
講野方面已經可以講短句,例如「爸爸打波」「媽媽跑步」,又學我叫奶奶和老公,模仿得似模似樣,最長果句係「女麻女麻湊包包放學」,成七個字咁長。

我成日都好想帶蓮蓉包去郊外,認識多些大自然,奈何成日得自己一個人,真係未夠魄力有住佢周圍去。有日終於等到佢老豆得閒,於是去左西貢北潭涌家樂徑行山,呢條路真係好易行,小朋友行就非常合適,不過蓮蓉包耐力未夠,行左一半就叫爸爸抱,希望下次佢可以行足全程啦(半小時路程之嘛!)