幼稚園(K1)面試篇 #基督教宣道會茵怡幼稚園

面試日期: 2014年11月15日

基督教宣道會茵怡幼稚園俾我感覺是一間很傳統的幼稚園，最吸引的是擁有區內少數有戶外遊樂設施，亦是咁多間我揀的幼稚園中最近屋企的一間，步程只需五分鐘。今年呢間幼稚園由K1開始也引入Phonics教學，可省下出面學的金錢。

由參觀、報名和面試，安排亦很有條理，最難得是在交表格當天，家長可以選擇面試時間(如果該時段未滿額的話)，家長問卷連報名表一併遞交，所以面試當天只需帶孩子面見即可。

我選了9am面試，由於呢間要小朋友獨自入課室面試，為免阿仔癡住我唔肯入，我叫老公帶佢去面試。結果阿仔是第一個面試，肯拖住老師手行入課室，五分鐘後老師和阿仔都笑咪咪咁出來，我幾肯定呢間一定收阿仔。

阿仔話有問生果和顏色，佢話識答。學校送左份禮物包，入面有一盒迷你維他奶、Oreo餅和一小包紫菜，全部都是阿仔喜愛的小食呢!

結果: AM offer

幼稚園(K1)面試篇 #天主教聖安德肋幼稚園

2014年11月8日，呢一日要去兩間幼稚園interview，本來唔係問題，問題係兩間相隔半小時!  天主教聖安德肋in 9:30am，青衣商會in 10am!  好在天主教聖安德肋成個過程只花20分鐘，一完左我就極速抱住個仔跑去搵老公(老公在門口開定BB車)，我一見到架BB車就盡花扣好安全帶，我地衝去青衣商會，沿途相信嚇親唔少去緊幼稚園interview的家長和小朋友，因為我同老公都跑得超快，用左3分鐘跑到去青衣商會，有驚無險。

天主教聖安德肋幼稚園面試都好特別下，在門口有老師幫所有入內的家長和小朋友擠搓手液，並確定有面試證才可上樓，上到樓才收面試證，然後在禮堂坐下，看幼稚園簡介video，看了10分鐘後，才叫名排隊，男女分開兩組，10個小朋友連家長一組(每位小朋友只限一位家長入內)，一齊入課室，入課室前派發印有小朋友名字的label,家長和小朋友各一張，此時才發現印漏了我們的label!  老師們沒有怪責誰，最後手寫名字在空白label上讓我們貼上。

入到課室，有前後兩排凳，小朋友坐第一排，家長坐第二排，老師有三位，一位mark分數，一位協助，一位發問。蓮蓉包聽到老師話坐第一排便極速坐下，心急到呢，我便叫他行入D坐，坐係前面小朋友隔離。然後老師確保坐亂次序的小朋友坐番啱，由於我個仔和前後兩個小朋友坐亂了要起身調位，作為媽媽好自然都想調番坐係自己小朋友後面啦，點知我隔離果位媽媽郁都唔郁，我唯有禮貌地問她可唔可以同佢調位，佢都仲係無動於衷!  真係好奇怪!  好在另一位受影響的家長都想調位，肯同我調，果位無反應的媽媽才意識到調位有佢著數，於是三位媽媽都調到自己孩子的後面位置。

正式開始，主考老師出場，好似上堂咁同小朋友打招呼，然後取出一個女孩子布公仔同大家打招呼，話公仔叫欣欣，想認識大家，叫小朋友逐個話俾欣欣知自己叫咩名。我個仔好緊張，全程捉實我隻手指公唔放，我都由他，好讓他可以多點信心表現自己。好似好多小朋友係細B，唔敢出聲，有個一入課室時已經哭，他的爸爸俾左粒餅佢食定驚，點知含住粒餅唔講野。另外有個唔識講自己全名，只叫乳名，老師都俾機會佢講多一次全名，不過無出聲。蓮蓉包都要等兩秒，我在背後問多一次你叫咩名呀才答，不過肯答已經好好的了，未warm up，課室又多人，都幾驚架。

跟住老師攞出一本大書，打開有一隻狗，叫小朋友逐個同小狗講hello。點知問左三分一小朋友，便轉頁，有隻山羊，然後其他小朋友陸續同山羊say hello，蓮蓉包呢次答得快左，把聲仲幾cute。又問左三分一小朋友便轉頁，有隻乳牛，蓮蓉包即刻叫「呢隻係乳牛」! 證明佢已warm up完，重拾多多野講本色，老師陸續去其餘小朋友等佢地say hello。

然後老師話同大家都識唱嘅「Head and Shoulders, Knees & Toes」，講真，你又知大家都識唱?!  好在屋企成日都有播呢首歌，不過蓮蓉包好緊張唔郁，唯有我嚟啦，又唱又跳，希望佢可以跟我做，點知佢唔郁，我就捉住佢手做動作，佢硬到郁唔到佢，連拍手都做唔到，算吧，眼見只有一兩個小朋友有跳，似乎呢班小朋友都係文靜D。

最後派禮物，可以揀長頸鹿或恐龍推棒棒車玩具，蓮蓉包就好有反應話我要長頸鹿，家長亦有一份學校資料收，就完成今次interview。

呢個形式都幾速戰速決，無反應就已經無望，對細B真係好難，就算蓮蓉包係大B都有D難，好在問題唔算多。

結果: pm waiting (即係唔收啦)

三十三個月大及 #K1面試心得分享

面試戰衣: Shirt - Gap, Jacket - Global Work, Trousers - Rag Mart, Shoes - Nike

呢個十一月係面試月，連續三個星期六都要面試K1，由於只有5間Interview，所以唔辛苦，不過少少緊張都是有的(包括我和阿仔，我老公就當返工的心情)。面試的詳程請留意我之後出的blog，希望幫到將來面試的家長吧。總的來說，大B真係著數D，講野又多，見識多D，無咁怕陌生人，尤其要小朋友自己面試的情況，小朋友因驚而哭就一定衰硬。我見我個仔拍埋D細B度，又生得高大過人，又不停講野，真係和細B相差好遠，等面試時，有細B家長見到我個仔咁不一樣，都慨嘆大B細B一齊面試真係唔公平。其實生理上細B未發展到呢個位係絕對正常，只係而家好學校僧多粥少，加上龍年效應和雙非，競爭之激烈真係唔係當事人係唔會明白，其他旁觀者真係唔好成日話D家長報咁多間做咩，如果我係細B的家長，也會報多過而家呢，只係唔會報多過12間，同埋每天只會interview上午時段，因為細B精力一般好快無電，如果你想佢讀上午班就梗係爭取上午interview，俾老師見佢地早上精靈可愛樣博老師好感，覺得佢返上午班較適合，所以交表一家要最早!  除非你想佢讀下午班就另作別論。

面試時除左一定要帶面試證和出世紙外，還要帶餅乾、繪本和濕紙巾，有時等面試真係有機會等45分鐘至1小時(所以我幾辛苦都要早起身交表，尤其心儀果一兩間一定爭取9am面見，小朋友最精神，又唔洗等咁耐，等得耐小朋友一定唔耐煩，心情差又點會in得好?)，等到肚餓唔出奇。帶繪本可以消磨時間，亦提升親子關係，老師見到都贏左印象分先啦，我唔建議帶玩具，一來等候區一般已有玩具，小朋友一定鍾意玩學校的玩具，貪其新鮮，如果帶自己玩具，小朋友基於安全感，一定會帶埋入面見室，阻止佢搞喊左就好難在interview有好表現。濕紙巾是萬一小朋友打噴嚏、流鼻涕、流鼻血(天氣乾燥唔出奇)、食餅整污糟件衫，都可以抹番，我個仔就係in in下打左兩個大噴嚏，噴左D口水落張枱，我抹完佢個鼻，再俾另一張濕紙巾佢自己抹枱，抹番自己的口水，咁老師咪見到佢有幫手做家務的能力囉。

K1面試，報了7間，全部是村校，因為不想老遠去九龍塘讀書，小朋友會好辛苦。有一間幼稚園太多人申請沒有interview機會，有兩間撞了時間放棄了其中一間，所以只interview 5間，蓮蓉包是大仔，雖然是龍B，但都不太擔心，所以沒有報太多間，不想小朋友大人一齊辛苦。

5間之中，兩間group interview，1間兩位家長和小朋友一齊面見，1間只見小朋友，1間小朋友和家長分開面見還要填2份問卷。

阿仔表現像平日的他，對陌生的老師往往要打量一下，沉默應對，所以interview第一間時，老師發問未必會即時答，要等一下才答，但又好主動禮貌問其他小朋友取玩具玩，其他細B的媽媽或許會被他嚇壞呢!  老師也很出奇他的表現，問我是否有上N班，我說沒有，只上playgroup，老師更加覺得不可思議呢! 

最感動的是當有兩間要阿仔自己入課室面試時，完全沒有扭計，非常有自信拖著老師手入課室，interview完還笑著出來，始乎他的成熟度真的ready返幼稚園了，所以無論有無幼稚園收他，我已經覺得很滿意了。面試結果要十一月底至一月中才收到通知，已知收到一間am offer，亦係心目中排第二位的幼稚園。

最近老公和阿仔看齒輪英文繪本，其實程序起碼是小三以上，不過男孩子天生對機械係特別有興趣，所以我買左呢本書《See Inside How Things Work》，是Usborne出版的。老公做動作解釋齒輪如何轉轉轉，將咁難明的理論簡化到幼兒程度，令阿仔好有興趣追看，看完還主動要求爸爸讓他畫畫，他嘗試畫出一個長形圓圈代表升降機，似乎科技知識已在內化了。

有一晚老公要去做球證，我話帶埋阿仔去，由於球賽在晚飯時間，所以我做了三角三文魚飯團，煮了紅蘿蔔仔和西蘭花做配菜，作為便當晚餐，老公第一次見我做飯團，嚇左一跳，讚嘆老婆非常專業，我真係好開心。阿仔好鍾意食飯團，尤其係塊紫菜，似乎我可以多在家做飯團俾佢作正餐，快快脆脆俾佢食完去玩，又唔會擔心佢食唔飽。

阿仔在球場成日追間爸爸去左邊，我就要指俾佢睇，其實無咩睇波，睇老公在球場跑步多D! 嘻嘻!睇完波搭的士回家，點知阿仔在的士賴尿，由於我抱住佢坐，所以我條褲中晒招，超慘!

Bambino Montessori Home果度已問左可以返到讀K1前，即是可以讀到三歲半，咁就唔洗中途轉playgroup啦!

成長進度:

自理能力:  學識著襪。多得我阿媽有次探阿仔時多口講句，俾佢試下自己著襪，平時蓮蓉包真係著唔到架，果日又真係威俾外婆睇

Maths: 一至二十的中英文已識背不過數數數完四就唔知點解去左六

Music: 識唱太陽伯伯和12345 Once I caught my fish alive，我愛媽媽(普通話版)識唱幾句，學緊唱Jingle Bell

用Home made playdough 扮賣雪糕

在海下灣玩貝殼

父子鞋

家中的美術堂 - Finger Paint畫樹葉

幼稚園(K1)面試篇 #保良局方王換娣幼稚園

蓮蓉包人生的第一次面試開始了，星期六早上九時面見保良局方王換娣幼稚園。由於此幼稚園只可以一位家長陪同，所以便由我帶阿仔去面試。這安排實在太好，因為同時間老公要到天主教聖安德肋幼稚園交報名表，最恐怖是老公六點九去到時已有廿幾人正在排隊，不比九龍塘名校遜色呢。

班房安排一次過接見四個家庭，坐下自選玩具玩，每個課室有兩位老師，每位老師負責問兩組家庭問題。

枱面有很多玩具，其中有一籃真生果，有香蕉、蘋果、橙，老師先問今日邊個帶你嚟呀，佢停一停先答媽媽，老師然後拿起逐個問生果的名稱，阿仔答得好輕鬆，老師又問他香蕉食唔食得，佢答唔食得，因為未熟，又真係wor,隻蕉仲幾綠下，連老師也說「你又知未熟嘅?」老師再問點樣先至熟呀，佢掛住玩無答，現在回想，其實當時如果自己即時引導個仔，例如問他熟香蕉是什麼顏色?  他可能識答，如果他再唔答就話一陣一齊去超市買香蕉試味好唔好，以佢咁為食的性格應該會有反應。後來離開學校後我再問他香蕉點樣先至熟，佢都係唔知，於是我教番佢，其實佢答未熟已經唔係一般小朋友識得答的答案，亦唔會在坊間的面試班背的答案，所以我都幾滿意佢呢D出人意表的答法。

老師叫佢揀玩具玩，佢望住我有D猶疑，我鼓勵佢去揀，你做得到嘅，於是佢去左斜對面小朋友張枱，有一盤工程車，問人地「請問可唔可以玩呢個?」老師都笑左，話佢識講請問，我當時好滿意，阿仔發揮平時唔怕生保又好發問的性格，老師即問我佢係咪讀緊N班，我答無，只返Playgroup，老師都非常意外，老師見佢掛住玩車，於是問我問題，例牌問點解揀我地學校，有無兄弟姊妹，平時邊個湊(老師一睇我個樣就估我應該要返工)，放左工會同仔仔做D咩野。

後來老師叫佢，話你終於應我喇(老師非常溫柔的聲線，佢又咁專心玩緊，聽唔到真係唔出奇，都隔成兩張枱斜角咁遠架)，我用手勢示意佢返埋我果度，老師問佢可唔可以切蘋果俾佢食，當時個仔玩緊切提子，唔啋佢，問左兩次都無反應，望都唔望個老師，我便幫老師問多次，佢又即刻肯做喎，仲肯扮餵老師食，跟住老師拿起一個人形布公仔，問佢可唔可以餵公仔食，個仔又發揮玩野的個性...餵落個鼻度!  老師問佢應該餵邊度食呀，佢都係餵落個鼻度，老師叫佢餵落咀度，佢先至餵落個咀度，老師想確認佢的認知，於是問佢媽媽個咀响邊度，點知佢指住自己個咀!  老師回應呢個係你個咀，咁媽媽個咀响邊度，佢即指住我個咀，然後老師叫佢錫錫媽媽，好在個仔好合作鍚左一啖，如果唔係會有理由相信我地的親子關係都幾有問題, 一額汗。老師再問公仔的眼睛响邊度，今次就即答，答啱。

另外三個小朋友都是男仔，月齡都比蓮蓉包細，坐得好定，不過講野好斯文，比較靜，我沒有留意他們的表現，只留意自己個仔的表現而已。

臨走前老師送每人一隻鴨仔，蓮蓉包竟然話...唔要!  我都覺得出奇，老師反應好快，即刻話「咁俾媽媽好嗎?」他便立刻給我，果然係trouble 2，不過最搞鬼係要走時，蓮蓉包玩到唔捨得走，我話不如出去搵爸爸、去公園玩都無動於衷，唯有話「咁媽媽走先喇」兼且起身，佢即刻起身，仲識幫我拍好張凳，再拍自己張凳，我即刻唔該佢和讚佢,唔係為搶分,而係真係多謝佢咁helpful和主動。可惜同老師講bye bye都係唔肯望老師，要我出手固定佢視線去老師度，費事再搞咁耐，搞到發脾氣仲大鑊。

我覺得個仔和自己的表現可以再好D，個仔唔係好理老師的指令，我又太緊張無咩執生，都好，下次in下一間會有多D經驗處理。

結果: AM offer!!! (大B真係著數D)

木婚紀念午餐 - #Gaddi's

Gaddi's是城中有名有歷史的高級法國餐廳,在半島商場內,雖然不是米芝蓮餐廳,但氣氛和質素依然會令淑女們心醉的。加上用匯豐信用卡簽賬可享9折優惠,老公覺得好抵食!

餐廳已換上聖誕裝飾,非常富有氣氛,有live piano 伴奏,女士們必份外受落。

這裡沒有米芝蓮餐廳的驚喜,卻顯得對傳統和食材原味的尊重,例如法式crepe,在客人面前由法國侍者即煎,用上最名貴的銅煎pan,燒香砂糖使crepe焦糖化,加上加熱橙酒帶來的酒香令簡單的crepe顯得不一樣。

生了孩子後要保持兩夫婦的感情,我們總愛透過食,食得精緻,在輕鬆而寧靜的環境慢慢談心,暢快愉悅。

salted & unsalted butter,最原始的味道,沒有添加配料

迷你牛角酥釀了洋蔥; 迷迭香麵包酥脆,兩件都非常好吃

老公喜歡迷你百吉包

聖誕裝飾處處

餐前小吃,三款也很美味

火腿釀雞肉

橄欖酥餅

芝士蝴蝶酥

吞拿魚,紅西椒

牛面頰,牛清湯啫哩,非常好味!

Parsnip soup,black truffle chicken dumpling,餃子好好食,湯頭夠熱富濃濃忌廉味

米形意粉,香草汁,想像不到意粉可以有這滑溜感,比risotto好吃好多

鱈魚,南瓜汁,魚質有點過熟

伴牛油蔬菜,有少見的青椰菜花,整體上非常鮮嫩

Earl Grey with Honey,我的最愛餐飲

Passion Fruit floating island,chocolate mousse, passion fruit sorbet, madeleine cakes - 不會過甜的甜品,經典的味道

Petite Four - lemon chocolate, berry jam chocolate, lavender truffle chocolate, white chocolate shell - I like the truffle chocolate most!

Crepe, 濃濃的酒香,經典的詮釋

首爾自由行2014 - Day 3 #明洞 #營養餃子 #Beans Bins #八色豚肉

這天來明洞，一早來吃粥做早餐。這間營養餃子有很多粥品選擇，而且味道很好(人參雞除外，可能太早雞肉未夠入味)，又可養生(例如鮑魚粥)，除了粥，也有刀削麵和餃子吃。

午餐離開明洞，去了所有旅遊書都推介的「八色豚肉」，其實是烤五花腩片，豬肉用不同調味醃，顏色便有不同，較特別的有紅酒味和人參味。

一坐下，店員便二話不說拿來整個套餐，原來這兒只獨沽一味賣這餐，非常奇怪。套餐有肉、無限添食的蔬菜，醬料，不少得的泡菜。水是自助自斟的。圓凳內可放手袋外套，可防止沾上油煙味，很有趣。店員會幫忙烤，但不會跟足全程，所以要自己留意是否已烤熟，慎防燒焦。

可能我對烤肉興趣不大吧，包了菜蔬同吃烤肉，也只吃了幾塊，味道其實可口，不過就是提不起勁。

吃完午餐返回明洞，胃納竟已呼喚下午茶了!  於是找Beans Bins來個豐富的Waffle下午茶。

Beans Bins其實都幾難搵，招牌不突出，藏在一建築內，要花些精神才找到。這兒專賣Waffle，是又鬆軟又大份，女孩子一份當正餐也可飽到晚餐，當下午茶點...還是兩人分享好了。除了甜Waffle，還有一款鹹Waffle。飲品有很多選擇，冷有沙冰，熱有咖啡和柚子蜜，女孩子聚會或太太們來鬆一鬆也很適合。另外，還有少量品牌餐具出售。

友人的香蕉Waffle芒果抹茶雪糕

我的紅莓藍莓Waffle配抹茶雪糕

鬆軟又夠大份，推薦!

三十二個月大

幼稚園開放日，玩彈床玩得很開心

成枱都係車，見到都開心

有八達通卡，又可以扮司機，非常興奮!

上個月忙於參觀幼稚園和申請入讀幼稚園事宜，奈何工作方面又忽然間忙起上來，我終於也病倒了，連蓮蓉包、老公和奶奶都傳染了，幸好蓮蓉包尚算強壯，只是間中咳兩聲，沒有發燒。

有一天，蓮蓉包貪玩推動教具矮櫃的層板，卻被層板夾傷左手食指，幸好沒有傷及關節，不過要貼上膠布。阿仔好好笑，雖然只有一根左手食指貼上膠布，他卻怕痛到不用左手做任何事，奶奶要他試下貼上膠布後的手指按壓會不會痛，他也沒有膽量試，我笑說面試時一定不可讓他貼膠布，否則他只用單手玩玩具，一定沒有學校收。

為預備幼稚園面試，我取出一些舊玩具作重溫用，雖然他已玩到熟，仍讓他練習一下，例如手抓板、套套杯、圈圈塔、串珠，亦讓他多玩拼圖。

部份幼稚園可以預約參觀甚至有開放日，我們都有帶蓮蓉包去，小朋友想東西果然有他一套，他會問我們為什麼學校沒有小朋友?  很有邏輯的一個問題，我便解釋星期六是不需要上學的，老師要星期六才有時間帶我們參觀。參觀時，我會留意校內的設施、分班、教具/玩具、勞作、功課、洗手間的安全和清潔情況。

可是交幼稚園申請表卻遇著挫折，由於有部份幼稚園的交表日期剛巧我另有其他事做或要上班的關係，於是要靠老爺幫手，不過他永遠不會依照我安排的時間交表，結果有面試撞時間的情況出現，氣得我七孔出煙!  只好怪自己所托非人，亦發現申請幼稚園那麼重要的事，只有我一人緊張，連老公都只是有時間才問兩句，那種心酸只有自己才明白，今次的教訓，使我將來所有重要事只可親力親為，因為沒有任何人可以幫助自己，下次申請小一時，我一定要親自交表和跟進所有事宜。

成長進度:

自理能力: 今個月有突破，經過多月來的練習和無數失敗，終於可以自己穿鞋和穿T-shirt，第一次成功那刻，四圍大叫「我著到喇!」，那種喜悅代表他的成功感非常大，目睹過程的我也有絲絲感動。

在Playgroup，玩「幫公仔穿衣」和衣飾框，以預備下一步為自己穿外套或裇衫。

Maths: 用蒙特梭利方法學圖形，用實物學，也有用圖形卡教具。本月開始經常問幾多點、今日幾多號，乘電梯時也特別留意層數，有次電梯忽然停錯樓層，幸好他覺得有異樣，問祖母這層是幾多層，才不致出錯電梯。

Sensorial: 終於開始玩Knob Cylinder，因為對大和小的概念已掌握不錯

Arts: 有目的畫畫,雖然幅幅畫都是圈圈，但原來代表不同意思，例如火龍人(他說是天上來的，我們不知道他說什麼),橢圓枱上面有好多碗碟食物,落雨,銅鑼灣地鐵站。除了蠟筆，開始引入Finger Paint和液體顏料，他的畫作亦非常漂亮，我亦好好收藏之。另外，很多外國媽媽都在blog分享秋季主題教學或勞作示範，我也鼓勵奶奶帶蓮蓉包去公園玩時執些樹葉回家玩。

童言童語：

奶奶問: 蓮蓉包識唔識揸飛機?

蓮蓉包答: 蓮蓉包唔識揸飛機，識坐飛機

(我真係笑左!)