廿一個月大

上個月係過得好開心的一個月,可能天氣開始無咁熱,多左帶個仔去公園玩,唔單止個仔開心,見到佢開心我都好開心。

說話方面,間中會有詞語,例如巴士,不過唔會自己講,係都要教佢講先肯講,單字就好多音都會自己發出。

有兩件事真係要紀錄低,第一件係,有日我放工返屋企,問佢返學開唔開心呀 (即係返playgroup開唔開心),佢即答「開心」,當時我真係喜出望外,開心係詞語,肯自己講都係極少有,而且由佢把口認同返playgroup開心,就證明當初我無揀錯呢間playgroup。我認為無論間playgroup口碑幾咁好,小朋友唔開心都無用。而事實上喺Bambino Montessori Home,阿仔亦學會自由都要有紀律,能自己選擇工作,亦學到不少新工作,性格上亦漸趨外向和有信心(有時見佢D表情仲有D囂張,激死!),不過佢實在太心急,例如次次落堂要排隊出課室,佢次次都係初初唔想走,但門一開就打尖要第一個出門口,由於佢生得比所有小朋友都要高大,所以一定能夠攝到第一,我唯有在日常生活教佢啦,例如次次搭巴士都教佢,我地要排隊先至可以上車。

第二件開心事是學會家人和自己的名字,呢樣係奶奶教的,問佢「XXX」係邊個,佢會答爸爸、媽媽、麻麻、爺爺或我,好得意架,我又唔知點解咁基本的事無諗過教佢,anyway,邊個教都好,識就開心。