廿二個月大

阿仔的反叛期已經開始左喇,而家成日同你唱反調,試你底線,做家長就要好堅定,咩事可以做,咩事唔可以做,如果唔係小朋友就無所適從。

十二月假期多,可以多D時間觀察個仔,尤其約埋一大班小朋友一齊玩,就更易看出蓮蓉包的性格。佢依然好奇心極強,比其他小朋友更強,去到一個陌生地方,都會每樣事物摸下睇下食下,唔係衝來衝去,佢比較慢熱,唔會對唔識嘅叔叔姨姨哥哥姐姐講野,只會望下人就算,要提佢打招呼。佢小肌肉發展得唔錯,有幾日竟然可以把自己的木枱的螺絲在無工具之下扭了出來! 還有,把外套的拉鍊扣拔掉,以後買外套都要小心檢查拉鍊扣才買。

大肌肉就更加不用擔心,會跑,有時用腳尖行,跳就要扶,上落樓梯快左,不過依然要扶。夠力用雙手拿起大石頭,然後放回地上。在公園玩,鍾意扭轉盤(扮揸車),爬隧道和滑梯已經唔驚,仲好鍾意玩。可惜而家D公園沒有攀架,無法讓他攀,如果外國的公園有,我實俾佢玩個夠。

講開玩,男仔都係鍾意玩車,我特意買一些真實的玩具車,我買了消防車,爸爸買了巴士,與現實聯系起來。我又在IKEA買了可砌配件的車和路軌,希望玩車之餘都可動動腦筋。

另外,爸爸在玩具反斗城買了Mega Blocks,$199,有100塊,阿仔都好鍾意砌,暫時只係砌高,充滿創意,但係又可學到如何可砌高一些。

平時見到小動物,會超興奮,貓貓狗狗最常見,商場寵物店有兔仔,都有機會見。遲D帶佢去動物園睇多D動物先。

說話依然是單字,依然好想學習,佢見到同齡的女孩子已經識講句子,好似有少少驚訝,我地唔心急,我自己都成三歲先識講野,又點會期望個仔而家就識講句子呢!  不過有樣野幾surprise,有次去公廁,去去下廁所,會突然講晒佢玩開的動物玩具名,連驢都識講,真係好搞笑,原來唔聲唔聲都識左好多野。

呢排佢好似想戒夜片,好多晚佢急尿會叫爸爸起身,同佢去廁所,日間好多時都唔會失手,但就靠我地定時定候帶佢去廁所,不過有次搭成個鐘頭車沒有廁所,佢都可以無賴尿,真係好叻仔。大便就識叫人,不過係叫「賴!」,真係好搞笑。雖然半夜係辛苦左,不過又表示佢大個仔左,都係開心事,而且又證明用布片真係快D戒片架!

而家仲識自己除鞋除襪,想學著鞋襪,不過梗係未得啦,要慢慢學呢。食飯多左時間可以自己餵自己食,不過仲未可以自己餵一餐,但係最頭痛係如果我地兩公婆揍,佢會食少好多野,掛住玩,有時玩到D飯周圍係,好浪費呢,不過我都知呢個係學習過程,一定要俾佢自己試多D,因為老人家唔會俾佢自己食,當然個仔在麻麻面前都寧願俾人餵。