廿五個月大

蓮蓉包的生日會,只是有家人、爺爺麻麻婆婆,今年我去出面整左個蛋糕,是芒果雲尼拿mousse開心果蛋糕,好複雜的味道,好好食。夜晚去左Yamm食Buffet,因為阿仔唔洗俾錢,佢又大食,好似抵D。

蓮蓉包開始對抹地有興趣,我地間中都會俾個迷你地拖佢抹地,當然未抹得乾淨,希望練多D越做越好啦。有次佢整污糟左個電視,佢識自己攞塊布抹乾淨,如果佢keep住咁自動自覺就好了。

蓮蓉包的小手指又大力左,在公園好鍾意搣樹葉,在家玩豆,鍾意搣黑豆衣。最慘係佢D車車,俾佢搣爛車胎!

而家好鍾意周屋走,周圍開櫃門尋寶咁,不過佢好乖,摸完D野會擺回原位,又唔會放入口,知道係咩就放低,好奇心好強。

蓮蓉包一向為食,試下俾隻雞翼佢咬,佢好快就食得好好,仲識咬軟骨食,用手食或用叉食都得。

而家用蠟筆畫畫畫多左好多圈圈,我買左Crayola俾佢畫,貪佢顏色靚又易抹,仲可以加水令顏色化開,做出唔同效果,真係好好玩。

Playgroup教左用交剪剪紙條,我就攞在IKEA買的交剪出來俾佢剪啦,點知把交剪對蓮蓉包來說太過實,用唔到,於是我在Muji買了把細交剪俾佢試,今次就得喇,雖然佢未好掌握到剪紙的手眼協調,但係佢就好有興趣研究把交剪,總想剪下自己隻手 (OMG!)。

而家玩倒豆準確度高左,成日扮酒樓侍應斟茶,斟到笑,但係只斟俾自己,唔斟俾我,激死。

而家口頭蟬係「咩野嚟?」,去百佳問得最多,其他佢只係知道物件名稱就足夠了。

三月又係花展的時間,我好鐘意花,睇得好開心,佢就對花無興趣,有一檔的裝置是交通工具X花花,上面放了巴士和地鐵,阿仔就超鐘意,仲扭要我地攞架車俾佢,佢就想喇。

佢對一切交通工具都好有興趣,包括他印有飛機圖案的雨衣,著上身就唔肯除。買左新工程車擦膠,玩到唔肯瞓,佢瞓左我咪收埋工程車,點知第二朝一開眼,就叫「玩」,一出廳唔見工程車就晴天霹靂,大叫車車呀。買左本交通工具的英文揭頁書,佢日日都要我陪佢睇。真係超級鍾意交通工具。

三月頭我公司有活動在愉景灣,夜晚可以叫埋老公和個仔來愉景灣酒店過夜。呢次係佢第一次不在家過夜,初時我都有D擔心佢瞓唔著,不過後來是擔心都多餘,佢日頭已經hyper到傻,不斷叫:「爸爸快D帶我去搭船…爸爸快D帶我去酒店」,煩到奶奶狂摧老公快D收工返屋企接阿仔走,笑到我呢!  於是夜晚不之幾好瞓,不過都醒左一次,我就俾個仔同我地瞓大人床,仲瞓到朝早六點,比平時五點瞓多一個鐘呢。阿仔好鍾意搭船,老公話佢係咁在船上叫「嘩」,入到酒店房就周圍搞,最鍾意搞燈掣,玩到唔需要玩具到可以消磨一小時。愉景灣酒店的BB床是網床,而且成間酒店得3張,係有D少呢。酒店有playroom俾小朋友玩,有卡通睇,有Lego,書,crayon,迷你滑梯和迷你搖搖船,設施唔多,不過有時間表安排特定活動俾小朋友,不過唔適合Toddler,於是我地帶左個仔去公園玩,佢仲開心。

三月廿一至廿三日就一家三口去左台北玩,目的係作為今年七月的pre-trip,試下同個仔搭飛機。今次去台北亦係佢第一次搭飛機,前一晚佢興奮到每兩小時醒一次,搞到我無覺好瞓,都好,佢一上到機,坐到起飛就瞓左,我地兩公婆就安安樂樂食飛機餐。今次旅程詳情請看上一個blog。