廿六個月大

上個月頭蓮蓉包開始學跳,可以放手跳兩下,不過一落地就想搵野扶,跟住會傻笑,好得意。

呢排開始轉天氣,佢夜晚瞓得好差,成日半夜醒左要搵我食奶,救命!  又試過凌晨三點半要起身玩,搞到老公抱開佢費事搞住我瞓,搞左成個鐘有多先至瞓番,好在到復活節我安排左一連串節目,令到佢每晚都攰到爆,先至有覺好瞓。

講開復活節,老公四日都要全日練波,仲忙過返工,我便摃起個仔嘅照顧和陪玩專員的雙重角色,好在有一日奶奶幫我揍一日,等我可以自己一個人出街shopping。呢個假期同個仔去行山頂(同老公的朋友去,所以佢D friend都問我老公去左邊,haha),去佐敦谷公園玩(同我D舊同事),去大埔海濱公園玩和看人家玩風箏(同我D大學朋友),少左煮野食,餐餐都機乎出街食,不過蓮蓉包掛住玩都無心機食,同佢平時貪食的樣子不一樣呢。我成日同自己講,就算老公唔得閒,我都要努力帶多D阿仔出街見識下,等佢同個社會多D接觸,同埋多D接觸大自然,辛苦都要做,因為小朋友成長得太快,要把握時間俾佢感受多一點生活。

阿仔仲未識唱歌,但發現佢比以前留心左聽兒歌,成日,黐住部CD機,聽到咩字就講出來。我唱  “The Wheels on the Bus”佢會成日講 “All Day Long”。又成日讀氹氹轉菊花圓炒米餅糯米團,媽媽帶我睇龍船,我唔睇,睇雞雞。越讀越快,不過讀到雞雞就會停,唔知係咪攰得滯呢。

平時夜晚我都會同個仔睇書,有本英文書我細個都有睇果個系列,主角是一隻豬,我買俾個仔果本就只有簡單的短句,有好多 “I can…”,我讀左好多次俾佢聽,佢就成日掛住揭書唔理我,我都無所謂,照讀可也。有一日去公園玩,我抱完佢放佢落地,佢無端端講 “I can walk.”,wow,好叻仔,原來佢真係有聽我講,令我更相信小朋友就算無反應都要教佢睇書,原來佢會不知不覺學識左唔少野。

蓮蓉包觀察力好強,有日奶奶同佢在商場,爸爸咁啱在店舖買野,佢都可以見到,話俾奶奶知,真係好利害,希望佢一路可以keep住咁強的觀察力和好奇心啦,呢兩樣野第時大個都好有用架。

阿仔呢個月終於肯玩泥膠,原來佢想切野的慾望好強,我俾把間尺佢玩切泥膠,佢可以玩成個鐘,不過只係想切泥膠,唔想用泥膠造型,都好,玩切野都係有助練習小肌肉,希望小手指再有力D可以教佢用筷子啦。